صاحب قراں اصغر کو یہ رتبہء اعلی عطا ہوا کہ جس کی رکاب دولت نصاب میں اس شوکت و حشمت کے شاہان عالی وقار حاضر ہیں۔

(۱۸۹۰ ، بوستان خیال ، ۸ : ۶۰۰)۔

جس جنس کی قیمت حد نصاب سے تجاوز نہ کرے اس کا محصول مسلمانوں کو معاف ہے۔

(۱۸۹۷ ، تاریخ ہندوستان ، ۷ : ۲۹۲)۔

قرآن مطلق زکوٰۃ کا حکم دینا ہے ، سنت نصاب اور حول کامل کی تعین کرتی ہے۔

(۱۹۰۷ ، اجتہاد ، ۱۶۲)۔

امام ابو حنیفہؒ کے پاس استعمال کے زیور پر اگر وہ نصاب کے برابر ہوجائے تو زکوٰۃ واجب ہوجاتی ہے۔

(۱۹۸۴ ، طوبیٰ ، ۱۲۴)۔

ثقافت لوگوں کی بودوباش ، ان کے جبلی Reflexes کی تہذیب ، دنیاوی کمال اور روحانی سکون حاصل کرنے کے لیے تخلیق اور نجات کے قابل ادراک نمونوں اور ریاضتوں کا نصاب رہی ہے۔

(۱۹۷۴ ، توازن ، ۹۷)۔

ادب اور عربیت اندلس کے نصاب تعلیم کا لازمی جزو تھا۔

(۱۹۱۴ ، مقالات شبلی ، ۵ : ۲۱)۔

ان کے نصاب میں نئی نئی مشینیں آئے دن داخل ہوتی رہتی ہیں۔

(۱۹۴۴ ، آدمی اور مشین ، ۲۴۸)۔

نصاب اس قدر پرانی روش کا تھاکہ اس سے جدید دور میں کوئی فائدہ پہنچتا نظر نہ آتا تھا۔

(۱۹۹۱ ، تعلیم و تعلم میں انقلاب کیوں اور کیسے ، ۳۶)۔

موتمر کے انعقاد کے لیے ممالک کی تعداد کم از کم چھ ہونی چاہیے اور اسی نصاب (کورم) پر عمل ہو گا۔

(۱۹۲۶ ، مسئلہ حجاز ، ۱۵۳)۔

کورم ، کسی انجمن ، مجلس یا اجتماع کے معینہ نصاب کے لئے بول چال میں مستعمل ہے۔

(۱۹۵۵ ، اردو میں دخیل یورپی الفاظ ، ۶۵)۔

نصاب درحقیقت ارکان کی اس کم سے کم تعداد کو کہتے ہیں جن کا کسی اجلاس میں حاضر ہونا ضروری ہے۔

(۱۹۷۰ ، پارلیمانی طریق کار ، ۱۹۲)۔

نصاب شہادت زنا کے لیے چار مرد ہیں۔

(۱۸۶۷ ، نورالہدایہ ، ۳ : ۷۹)۔

انھوں نے ہبہ کے دعوے کا یہ جواب دیا ہے کہ نصاب شہادت نہیں تھا۔

(۱۸۹۵ ، آیات بینات ، ۲ : ۱۴۲)۔

سات جرموں میں نصاب شہادت کی ضرورت ہے اور نصاب دو گواہوں سے ہوسکتا ہے۔

(۱۹۲۵ ، قرآن مجید کے فوجداری قوانین ، ۴۷)۔

ایک دو شعر اچھا نکل آیا ، باقی کم وزن اور پھس پھسے شعروں سے غزل کا نصاب پورا کردیا۔

(۱۸۹۳ ، مقدمہء شعرو شاعری ، ۱۴۸)۔

ہر حرف کو ہزار بار شمار کر کے پڑھے مثلاً بیس حرف کو بیس ہزار پڑھے ۔۔۔۔۔ اور بیس حرف کو اندر بیس کے ضرب کیا ۴۰۰۰۰ اور حاصل ضرب کو جمع کیا ، اس کو نصاب کہتے ہیں۔

(۱۹۵۱ ، مفتاح الجفر، ۱۹۳) ۔

ایک نصاب کے بعد ۴ تا ۶ہفتہ کا وقفہ دینا چاہیے۔

(۱۹۴۸ ، علم الادویہ (ترجمہ) ، ۱ : ۲۶۹)۔

تیرھویں چودھویں صدیاں ۔۔۔۔۔ شایستگی کے ایک مناسب نصاب کے حاصل کرلینے کے سبب سے عہد وسطیٰ کے ساتھ ملقب ہیں۔

(۱۸۸۹ ، رسالہ حسن ، مئی ، ۳۶)۔

جب اس کا نصاب لیاقت تمام ہوجاتا ہے تو اس کی تکمیل اور اس کے فائدے کے لیے ہستی کے عالم میں اوسے نمودار کرتا جاتا ہے۔

(۱۹۱۰ ، العجالۃالنافعہ (ق) ، ۲۴)۔

شخص اکبر کے کمالات کا نصاب ۔۔۔۔۔ آخری حد کو پہنچ گیا۔

(۱۹۵۶ ، مناظر احسن گیلانی ، عبقات ، ۲۲۲)۔

تائید ایزدی ہم ناتواں انسانوں کا بھی نصیب اور ان کے کاموں کا نصاب ہے ۔

(۱۹۹۸ ، قومی زبان ، کراچی ، نومبر ، ۲۴)۔

یہ چول محور کا کام دے گی اس محور کو اصطلاحی زبان میں نصاب کہتے ہیں۔

(۱۹۳۱ ، عملی طبیعیات ، ۱۱۸)۔

عام ترازو پہلی طرز کا ایک لیور ہے جس کی ڈنڈی کے وسط میں نصاب (Fulcrum) ہوتا ہے۔

(۱۹۶۵ ، مادے کے خواص ، ۱ : ۲۳۰)۔