۰۱ زبردست ، صاحب قوت و اختیار ، غالب ، قادر ؛ اللہ تعالیٰ کا ایک صفاتی نام .
تُہیں ہے خلیل ہور تو نہیں کریم
تُہیں ہے عزیز ہور تو نہیں حکیم
( ۱۶۰۹ ، قطب مشتری ، ۱ ) .
خالق نے کیا جماد پیدا
خود اسمِ عزیز سے ہویدا
( ۱۸۷۴ ، جامع المظاہر ، ۲۱ ) .
تو سلام و خالق و متعالی و عدل و کریم
تو عزیز و باری و غفّار و فتّاح و علیم
( ۱۹۷۴ ، الحمد ، ۷۴ ) .
۰۲ پیارا ، محبوب .
اب سن میرے یار عزیز
عمر ہماری گنی ناچیز
( ۱۵۰۳ ، نوسرہار ( اردو ادب ، ۶ ، ۲: ۵۰ ) ) .
اونو بعد عثمانؓ صاحب تمیز
کہ ہیں بھوت پیارے نبیؐ کے عزیز
( ۱۶۳۸ ، چندر بدن و مہیار ، ۸۰ ) .
ماہ نو کی نمن ہے سب کوں عزیز
اس سبب کم نما ہے امرت لال
( ۱۷۰۷ ، ولی ، ک ، ۱۱۵ ) .
جان سب سے عزیز ہے
( ۱۸۰۲ ، باغ و بہار ، ۱۳۵ ) .
اولاد سے زیادہ انسان کو کیا چیز عزیز ہے .
( ۱۹۰۴ ، مقالات شبلی ، ۱: ۶۳ ) .
ان کی شخصیت میں یہ حسن پیدا ہوگیا تھا کہ ہر کس و ناکس کو وہ عزیز ہوجاتے تھے .
( ۱۹۸۴ ، مقاصد و مسائل پاکستان ، ۲۲۹ ) .
۰۳ دوست ، یار ، ساتھی ، آشنا ( عموماً اپنے سے عمر میں چھوٹے کے لیے مستعمل ) .
عزیزاں بعد مرنے کے نہ پوچھو تم کہ تنہا ہوں
لکھا ہوں پردۂ دل پر خیال اُس یار جانی کا
( ۱۷۰۷ ، ولی ، ک ، ۳۱ ) .
ہم سے بھی تو کچھ کہو عزیز و
کیا ذکر تھے سب وہاں ہمارے
( ۱۸۶۵ ، نسیم دہلوی ، د ، ۱۹۸ ) .
بعینہ یہی حالت اس عزیز کی تھی .
( ۱۹۳۵ ، چند ہمعصر ، ۷ ) .
اے عزیز تو مڑکر نہیں دیکھ سکتا .
( ۱۹۸۷ ، آخری آدمی ، ۵۷ ) .
۰۴ قرابت رکھنے والا ، رشتہ دار .
بادشاہ کے عزیزاں بادشاہ کے خویشاں قرابتاں بادشاہ کے پیاریاں ... سب اپنی مراد کوں انپڑو .
( ۱۶۳۵ ، سب رس ، ۲۷۶ ) .
ہچکیاں آتی ہیں کیوں عالمِ غربت میں دلا
کیا عزیزوں کو میں آوارہ وطن یاد آیا
( ۱۸۵۸ ، امانت د ، ۷ ) .
ان کا کوئی عزیز یا رشتہ دار نہیں مارا گیا تھا .
( ۱۹۳۸ ، حالات سرسید ، ۲۰ ) .
دیکھئے جو لوگ یہاں آتے ہیں وہ ہمارے آپ کے عزیز رشتہ دار ہیں نا .
(۱۹۷۰ ، زمیں اور فلک اور ، ۷۹ ) .
۰۵ (i) گراں قدر ، پیش بہا .
غیرتِ یوسف ہے یہ وقتِ عزیز
میر اس کو رائیگاں کھوتا ہے کیا
( ۱۸۱۰ ، میر ، ک ، ۱۳۵ ) .
اپنے وقت عزیز کا ایک معتدبہ حصہ خاص ایسے کام میں صرف کرنا .
( ۱۸۷۱ ، مقالات حالی ، ۱: ۳ ) .
تو بچا بچا کے نہ رکھ اسے ترا آئنہ ہے وہ آئنہ
کہ شکستہ ہو تو عزیز تر ہے نگاہِ آئنہ ساز میں
( ۱۹۲۴ ، بانگ درا ، ۲۸۱ ) .
(ii) بزرگ ، گرامی ، معزز .
اندر ہی درویش ہے اندر دنیا دار
اندر مانہہ عزیز ہے اندر مانہہ خوار
( ۱۶۵۴ ، گنج شریف ، ۲۱۶ ) .
کیا کس و ناکس پہ تھا صدمہ کیا جسوقت دفن
ڈالتا تھا خاک سر پر ہر عزیز و مبنذل
( ۱۸۵۱ ، مومن ، ک ، ۱۸۳ ) .
قوم کی حالت تباہ ہے ، عزیز ذلیل ہوگئے ہیں .
( ۱۹۴۶ ، محمود شیرانی ، مقالات ، ۲۰۰ ) .
۰۶ ( حدیث ) آحاد کی ایک قسم جسے پر زمانے میں دو راویوں نے روایت کی ہو .
( ماخوذ : نورالہدایہ ، ۱: ۵ ) .
آحاد تین قسم ہے ، مشہور اور عزیز اور غریب .
( ۱۸۶۷ ، نورالہدایہ ، ۱: ۴ )
مرفوع ، موقوف ... مشہور و عزیز ... کتنی اقسام حدیث ہیں .
( ۱۹۸۶ ، اردو میں اصول تحقیق ، ۱: ۴۲ ) .
۰۷ قدیم زمانے میں مصر کے بادشاہ کا لقب ، ( مصر کے وزیر کو بھی عزیز کہتے تھے ) .
وہ علامہ عصر کا ہو یا عزیز مصر کا .
( ۱۸۰۱ ، باغ اردو ، ۱۱۹ ) .
۰۸ ایک قسم کی تلخ بُوٹی جو مقوی معدہ ہے ، قنطاریون
( ماخوذ: پلیٹس ) .
[ ع ] .
اہم اطلاع
اردو لغت بائیس ہزار صفحوں پر مشتمل ، دو لاکھ چونسٹھ ہزار الفاظ کا ذخیرہ ہے . اسے اردو زبان کے جیّد اساتذہ نے 52 سال کی عرق ریزی سے مرتب کیا ہے .
زیر نظر ویب سائٹ انسانی کاوش ہے لہذہ اغلاط کے امکانات سے مبرا نہيں ، آپ سے التماس ہے کہ اغلاط کی نشان دہی میں ہماری معاونت فرمائیں .
نشان دہی کے لیے ہماری ویب سائٹ پر رابطہ کے ان باکس میں اپنی رائے سے آگاہ کریں .
