۱. (i) وہ رطوبت جو کسی نباتی یا حیوانی جسم کے اندر پائی جائے.
عرق جو حیوانات کے مادوں میں ہوتا ہے اسے گاسڑک عرق کہتے ہیں.
(۱۸۴۱ ، مقاصد علوم ، ۹۴)
درختوں کے تنوں کے اندر عرق وغیرہ منجمد ہوجاتا ہے.
(۱۹۰۶ ، تربیت جنگلات ، ۶)
جسم کا عرق ، بالعموم (Pharynx) کے پمپی عمل کے ذریعے چوس لیا جاتا ہے.
(۱۹۷۱ ، حشریات ، ۹۵)
(ii) کسی پھل کا نچوڑ ، رس ، افشردہ ؛ (طِب) کسی چیز کا کشیدہ کیا ہوا پانی ؛ دواؤں کی بھاپ سے بنایا ہوا پانی (جو بطور دوا استعمال کرتے ہیں).
نیں تو کاملاں کے آنگے یوبی ایک عرق ہے ، عرق اور اس میں کیا فرق ہے.
(۱۶۳۵ ، سب رس ، ۳۱)
عرق دوں گا گھنٹے گھنٹے بعد ایک ایک چمچہ پلانا.
(۱۸۸۵ ، محصنات ، ۱۸۶).
بڑے حکیم صاحب کے بنوائے ہوئے جولدش اور عرق بھی ڈاکٹر کی اجازت سے وقتاً فوقتاً دئے جاتے تھے.
(۱۹۲۴، اختری بیگم ، ۳۹).
لو یہ عرق پی لو اور یہ سفوف کھا لو.
(۱۹۶۸ ۔ غالب ، ۱۶۸)
(iii) (کنایتہً) شراب ، تیز و تند شراب.
سب نے عزت سے ان کا استقبال کیا خوب خوب عرق پیا گیا.
(۱۸۹۱ ، قصہ حاجی بابا اسفپانی ، ۲۵۲).
بعد میں مجھے خبر ہوئی کہ صراحی میں پانی نہیں عرق (شراب) تھا.
(۱۹۴۴ ، سوانح عمری و سفر نامۂ حیدر ، ۱۵۸)
وہ گھوڑوں کا گوشت کھاتے تھے اور عرق (شراب) نہیں پیتے تھے.
(۱۹۶۷ ، ردو دائرۂ معارف اسلامیہ ، ۳ : ۹۳۵)
۲. وہ رطوبت جو بدن کے سامات سے خارج ہو ، پسینہ.
عشّاق کوں پیو یا دسوں مے پینا روا ہے
اس مکھ کے عرق باج روا نہیں منجے آشام
(۱۶۱۱، قلی قطب شاہ ، ک ، ا : ۱۸۰)
خوباں حیا سوں غرقِ عرق ہوں تو کیا عجب
جس وقت جلوہ گر ہو جمالِ گوبند لال
(۱۷۰۱، ولی ، ک ، ۱۱۵).
گر مشک فشاں ہو عرقِ روے محمدﷺ
بس جاے زمانہ صفتِ موے محمدﷺ
(۱۸۷۴ ، نشید خسروانی ، ۷۸)
حضرت انسؓ کی والِدہ ... آپﷺ کا پسینہ ایک شیشی میں جمع کر لیتیں مرتے وقت وصیت کی کہ کفن میں حنوط ملا جائے تو عرقِ مبارک کے ساتھ ملا جائے.
(۱۹۱۴، سیرۃ النبیؐ ، ۲ : ۳۸۶).
پیشانئ حسین پہ کچھ بل پڑے ہوئے
آئینے پر عرق کے نگینے جڑے ہوئے
(۱۹۸۱ ، شیادت ، ۸۹)
۳. کھجور کے پتوں سے بنا ہو ٹوکرا.
حضرتؐ نے اون کی بیوی سے کہا کہ لے جا یہ عرق کھجور کا ، کھلا دے اوس کو ساٹھ مسکینوں کو اور وہ عرق ساٹھ صا کا تھا.
(۱۸۶۷ ، نورالہدیہ ، ۲ : ۷۴).
[ ع ]
اہم اطلاع
اردو لغت بائیس ہزار صفحوں پر مشتمل ، دو لاکھ چونسٹھ ہزار الفاظ کا ذخیرہ ہے . اسے اردو زبان کے جیّد اساتذہ نے 52 سال کی عرق ریزی سے مرتب کیا ہے .
زیر نظر ویب سائٹ انسانی کاوش ہے لہذہ اغلاط کے امکانات سے مبرا نہيں ، آپ سے التماس ہے کہ اغلاط کی نشان دہی میں ہماری معاونت فرمائیں .
نشان دہی کے لیے ہماری ویب سائٹ پر رابطہ کے ان باکس میں اپنی رائے سے آگاہ کریں .