دل چرایا ہے وہ اب آنکھ ملائیں کیونکر

سامنے ہوتی ہے مشکل سے گنہگار کی آنکھ

ازرق تھا فکر میں کہ بڑے پیچ پڑگئے

آنکھوں میں فرق آگیا بیٹے بچھڑ گئے

جو دیکھے آنکھ سے انکار کی سوے یوسف

پتا وہ شکل کا اس کی بھی دیوے زشتی سے

دبدبہ بھی ہے وہی طرز سخن بھی ہے وہی

آنکھ بھی ہے وہی ابرو کی شکن بھی ہے وہی

آنکھ اسے کہیے جو دیکھے وہ جمال

کان وہ ہے جو سنے گفتار یار

سنی سنائی پہ ایقان واہ کیا کہنا

بغیر آنکھ کے عینی گواہ کیا کہنا

حسن کب ان کو نظر آتا ہے

آنکھ جن کی ہے قباحت کی طرف

صاحب کی آنکھ اب جو عروس اجل پہ ہے

اپنی بھی آنکھ خالق عزو جل پہ ہے

کس مزے سے یہ باظہار وفا اس نے کہا

مت بنا بات نہیں اب تری جھوٹے وہ آنکھ

دکھلائے ہم نے لے کے جو دامن پہ در اشک

قائل ہماری آنکھ کے سب جوہری ہوئے

جن مردماں کو آنکھیں دیا ہے خدا نے وے

سرمہ کریں ہیں رہ کی تری خاک دھول کا

یاد ہے اب بھی اے میاں مخلص

کہ تمھیں آنکھ سے بلاتے تھے

صحبت کا رقیبوں کی ہے ادنیٰ یہ کرشمہ

جو آنکھ سے فرماتے ہیں وہ دل میں نہیں ہے

ہشیار اسیر آنکھ ہے تجکو جو سخن میں

غافل ہے وہ فن سے جو کہے خواب کا پھاہا

جو لوگ کہ رکھتے ہیں اسیر آنکھ سخن میں

رکھتے ہیں وہ سر پر میرے دیواں کو ادب سے

آنکھ لگتے ہی جان کھو بیٹھے

جان شیریں سے ہاتھ دھو بیٹھے

لیا نہ دل مرا اک بوسے پر وہ یوں بولا

ہماری آنکھ میں اتنے کا تو یہ مال نہیں

سن کر سقر کے نعرۂ ہَل مِن مَزید کو

آنکھیں تری چلی گئیں دوزخ کی دید کو

دیکھا زرہ نے چار طرف رن میں بارہا

حداد نے بنائی ہیں آنکھیں ہزار ہا

وہ تیغ تیز آئنہ پیکر پری نثراد

قبضے کی آنکھ ، نون کی سورت پہ حق کا صاد

وہ دائروں کی آنکھ نہیں وہ نظر نہیں

فعلوں کا ہے یہ حال کہ اک حال پر نہیں

مشک کو زد سے ہر اک طرح بچاتا ہے جری

آنکھ کی ڈھال پہ اک تیر کو روکا ہے ابھی